საქართველოს მოსახლეობის მიერ ჯანდაცვის სერვისებისათვის გაწეული მთლიანი დანახარჯის მესამედზე მეტი (36%), მედიკამენტებზეა დახარჯული. ამ მაჩვენებლით,  მსოფლიოში ერთ-ერთი მოწინავე ქვეყანა ვართ.

 

მედიკამენტებზე გაწეული ხარჯების 96% - ს მოსახლეობა საკუთარი ჯიბიდან იხდის. სახელმწიფოს კონტრიბუცია მოსახლეობის მედიკამენტების ხარჯების დაფარვაში მხოლოდ ორი პროცენტია. 2017 წელს მედიკამენტებზე მოსახლეობის მიერ ჯიბიდან გადახდილმა თანხებმა ჯამში 983 მილიონი ლარი შეადგინა.

 

მედიკამენტებზე დანახარჯი საქართველოს მოსახლეობისთვის მძიმე ფინანსური ტვირთი და მათი გაღარიბების ერთ-ერთი მიზეზია. ​

 

მოსახლეობის ჯიბიდან ჯანდაცვაზე გადახდილი ყოველი 10 ლარიდან, 7 მედიკამენტებზე იხარჯება. ეს დანახარჯი განსაკუთრებით პრობლემურია მოსახლეობის უღარიბესი ფენისთვის, რადგან სწორედ ამ ტიპის დანახარჯის გამო მათი 90%  კიდევ უფრო ღარიბდება. 2018 წელს ჯანდაცვაზე გაწეული დანახარჯების გამო ოჯახების  7% გაღარიბდა, 17% კი კატასტროფული დანახარჯების წინაშე აღმოჩნდა. სამწუხაროდ, ევროპის რეგიონში ეს ყველაზე მაღალი მაჩვენებელია.

 

საქართველოში მედიკამენტებზე განსაკუთრებულად მაღალი დანახარჯების ერთ-ერთ წამყვან ფაქტორს ფარმაცევტული პოლიტიკის და რეგულირების მნიშვნელოვანი ხარვეზები წარმოადგენს, რაც მედიკამენტების არარაციონალურ მოხმარებასა და ფასების უკონტროლო ზრდას უწყობს ხელს.